Tekur van Basten við Bayern?

Hollendingurinn Marco van Basten verður líklega næsti þjálfari þýska stórliðsins Bayern München ef marka má fjölmiðla í Þýskalandi.

Van Basten er nú þjálfari hollenska landsliðsins en ætlar að láta af störfum eftir Evrópumótið næsta sumar.

„Það væri eðlilegt skref fyrir mig að taka að mér þjálfun félagsliðs enda kominn tími á eitthvað annað," sagði van Basten í viðtali nýlega. Hann hefur einnig verið orðaður við AC Milan og Barcelona.

Ottmar Hitzfeld hefur lýst því yfir að hann muni hætta þjálfun Bayern München eftir yfirstandandi tímabil.