Hækkun á evrópskum hlutabréfamörkuðum

Vikan hefur byrjað á jákvæðum nótum á þeim fjármálamörkuðum sem hafa opnað úti í hinum stóra heimi í dag. Gengi hlutabréfa hækkaði almennt á mörkuðum í Asíu auk þess sem hlutabréfaverð hefur verið á uppleið í Evrópu.

Þannig hækkaði Nikkei-hlutabréfavísitalan í Japan um 0,35 prósent við lokun markaða þar í landi í morgun. Þetta er jafnframt sjötti dagurinn í röð sem vísitalan hækkar. Stærsta hlut að máli eiga væntingar fjárfestingar um að verð á hrávöruverði eigi enn eftir að hækka. Þá er reiknað með að eftirspurn eftir vinnuvélum og tækjum muni aukast vegna uppbyggingarstarfs í kjölfar jarðskjálftans í Kína fyrir viku og hækkaði gengi fyrirtækja í þeim geira.

Gullverð hækkað sömuleiðis en það mun vera merki um að fjárfestar séu að byggja upp varnir gegn aukinni verðbólgu, að sögn Bloomberg-fréttaveitunnar.

Þá hefur Dax-vísitalan í Þýskalandi hækkað lítillega, um 0,22 prósent. FTSE-vísitalan í Bretlandi og Cac 40-vísitalan í Frakklandi standa hins vegar svo til óbreyttar.