Trezeguet og Ibrahimovic orðaðir við Barcelona

Umboðsmenn þeirra David Trezeguet og Zlatan Ibrahimovic segja að Börsungar séu á höttunum eftir þeim.

Trezeguet hefur verið orðaður við Barcelona undanfarin tvö ár en nýr knattspyrnustjóri liðsins, Pep Guardiola, hefur mikinn hug á að stilla þeim Trezeguet og Thierry Henry saman upp í framlínu félagsins en þeir léku saman hjá Mónakó á sínum tíma.

Antonio Caliendo, umboðsmaður Trezeguet, segir að áhugi Börsunga sé ekki nýr af nálinni og að ekkert sé víst í þeim efnum.

Umboðsmaður Ibrahimovic, Mino Raiola, segir að það séu góðar líkur á því að Zlatan fari til Barcelona í skiptum fyrir Samuel Eto'o. Zlatan leikur með Inter á Ítalíu en Trezeguet með Juventus.

Raiola segir að félögin þurfi fyrst að ná saman en ef það gerist munu þeir skoða þann möguleika vel að fara til Barcelona.