Valuev batt enda á titilvonir Holyfield

Bandaríski hnefaleikarinn Evander Holyfield þarf líklega að gefa upp draum sinn um að verða heimsmeistari í fimmta sinn á ferlinum eftir að hann tapaði fyrir rússneska tröllinu Nikolay Valuev á laugardaginn.

Holyfield stóð sig mjög vel í bardaganum og ekki var að sjá að hinn 46 ára gamli refur væri ellefu árum eldri, 30 sentimetrum lægri og 44 kílóum léttari en óárennilegur andstæðingurinn.

Valuev heldur því WBA beltinu sínu eftir að dómarar dæmdu honum sigur á stigum. Einn dómarinn dæmdi bardagan jafnan en hinir tveir dæmdu þeim rússneska 116-112 og 115-114 sigur.

"Ég var ekki sammála dómurunum en að öðru leyti var ég sáttur við frammistöðu mína. Valuev er erfiður andstæðingur, ekki síst vegna stærðarinnar - og hann nýtir hana gríðarlega vel," sagði Holyfield.

Holyfield hafði vonast til að slá met George Forman sem á sínum tíma varð heimsmeistari í þungavigt 45 ára að aldri.

Hann hefur fjórum sinnum orðið heimsmeistari, síðast árið 2000, en hefur aðeins unnið fimm bardaga síðan 2001.

Holyfield vann sinn fyrsta þungavigtartitil árið 1990 þegar hann sigraði James Douglas, en átti þar áður að baki heimsmeistaratitla í léttari flokki.