Víkingur getur komist upp í kvöld

Það er stórleikur í 1. deild karla í handbolta í kvöld þegar Víkingur tekur á móti ÍR. Liðin berjast um að fylgja FH upp í efstu deild en með því að ná stigi í kvöld tryggir Víkingur sér úrvalsdeildarsætið.

ÍR þarf nauðsynlega á sigri að halda. Liðið er tveimur stigum á eftir Víkingum. Víkingur leikur sinn síðasta leik í kvöld en ÍR á eftir að mæta FH. Takist ÍR að landa sigri í kvöld þarf liðið að ná stigi gegn FH í síðasta leiknum þar sem Víkingar hafa mun betri markatölu.

Nú er 100 ára afmælisár Víkings og því ansi góð afmælisgjöf takist liðinu að tryggja sér upp í efstu deild í kvöld. Leikurinn hefst klukkan 19:00 í íþróttahúsi Víkings.