Alves spenntur fyrir Barcelona

Daniel Alves segir að hann myndi gjarnan vilja spila með Barcelona á næsta tímabili en hann segist nú vera tilbúinn að fara frá Sevilla til stærra félags.

Brasilíumaðurinn Alves var nálægt því að fara frá Sevilla síðastliðið sumar er Real Madrid og Chelsea reyndu að kaupa hann en tilboðum félaganna var hafnað.

Nú hefur Alves hins vegar gefið til kynna að hann vilji fara og herma sumir fréttamiðlar á Spáni að hann hafi þegar komist að samkomulagi við Barcelona ef félögin tvö komast að samkomulagi um kaupverð.

„Það væri ótrúlegt að fara til Barcelona, alger lúxus. En félagið þarf fyrst að komast að samkomulagi við Sevilla," sagði Alves.

„Ég væri mjög ánægður að fá tækifæri til að spila fyrir þá en Milan, Chelsea og Madrid eru líka með sterk lið. En ég myndi helst vilja vera áfram á Spáni þar sem að ég þyrfti að byrja aftur á núlli ef ég færi til Englands eða Ítalíu."