Stefnir í methalla á fjárlögum í Bandaríkjunum

Halli á fjárlögum Bandaríkjanna mun nema 438 milljörðum bandaríkjadala, samkvæmt áætluðum tölum fjárlaganefnd bandaríska þingsins, sem birtar voru í dag. Þetta jafngildir 40 þúsund milljörðum íslenskra króna. Gangi það eftir hefur hann aldrei verið meiri. Áætlaður fjárlagahalli nemur 407 milljörðum bandaríkjadala á þessu ári. Nefndin segir útlit fyrir að útgjöld bandaríska ríkisins hafi aukist um 8,3 prósent á árinu frá í fyrra á sama tíma og tekjur dragist saman. Fjárlagaárinu lýkur um næstu mánaðamót. Breska ríkisútvarpið vitnar til Peters Orzags, formanni nefndarinnar, sem segir að enn sé of snemmt að segja til um að samdráttarskeið sé runnið upp í Bandaríkjunum. Líkur séu enn á að svo geti farið á næsta ári. Draga megi úr líkunum - og hallanum - með því að reikna inn í fjárlögin kostnað bandaríska ríkisins vegna yfirtöku á hálfopinberu fasteignalánasjóðunum Fannie Mae og Freddie Mac, sem tilkynnt var á sunnudag.