Ég má ekki við því að gera fleiri mistök

Breski ökuþórinn Lewis Hamilton hjá McLaren segist ekki mega við því að gera fleiri mistök ef hann ætli sér að vinna sinn fyrsta heimsmeistaratitil í Formúlu 1.

Hamilton hefur aðeins eins stigs forystu á Felipe Massa hjá Ferrari þegar fjórar keppnir eru eftir af mótinu.

"Ég er í forystu núna af því ég hef gert færri mistök en í fyrra. Maður verður að fara inn í hverja keppni með hjartanu, en maður verður líka að vera skynsamur. Ég hef ekki efni á að gera fleiri mistök," sagði Hamilton.

Næsta keppni fer fram í Singapúr þar sem keppt verður í fyrsta sinn, en þar á eftir verður keppt í Japan, þá Kína og svo fer lokamótið fram í Brasilíu.

"Singapúr er braut þar sem keppt verður að næturlagi og enginn okkar er vanur slíku, en við höfum ekki áhyggjur af því" sagði Hamilton.