Óbreyttir stýrivextir í Bretlandi

Englandsbanki, seðlabanki Bretlands, ákvað í dag að halda stýrivöxtum óbreyttum í 5,5 prósentum. Mjög hefur verið þrýst á bankastjórnina að koma til móts við ótta manna um samdrátt í efnahagslífnu og lausafjárskort með lækkun vaxta þrátt fyrir verðbólguþrýsting í hagkerfinu.

Breska ríkisútvarpið (BBC) segir líkur á að niðurstaðan komi til með að valda nokkrum vonbrigðum, ekki síst í smásölugeiranum. Eins og fram hefur komið dró úr verslun í Bretlandi um jólin, mismikið þó, en forstjórar nokkurra verslanakeðja segja útlit fyrir að neytendur muni halda að sér höndum á næstunni.

BBC hefur eftir markaðsaðilum, sem sögðu nokkrar líkur á stýrivaxtalækkun í dag, meiri líkur en meiri á lækkun vaxta á næsta fundi bankastjórnarinnar í næsta mánuði.

Englandsbanki lækkaði stýrivextina síðast í jólamánuði nýliðins árs um 25 punkta og fóru þeir þá úr 5,75 prósentum í 5,5 prósent.

Evrópski seðlabankinn birtir vaxtaákvörðun sína í dag. Ffjármálasérfræðingar spá því að niðurstaðan verði á sömu nótum og hjá Englandsbanka.