Tyrkir ráðast inn í Írak

Tíu þúsund manna tyrkneskt herlið réðst í dag yfir landamæri Íraks til að ráðast á búðir skæruliða Kúrdiska verkamannaflokksins svonefnda.

Skæruliðarnir hafa fellt fjölmarga Tyrki í árásum yfir landamærin undanfarna mánuði.

Tyrkir hafa aðallega svarað fyrir sig með takmörkuðum loftárásum á einstök skotmörk.

Tyrkneska þingið samþykkti hinsvegar fyrir árámót að heimila hernum að ráðast yfir landamærin. Yfir 100 þúsund hermenn hafa síðan verið í viðbraðsstöðu á landamærunum.

Talsmaður bandaríkjastjórnar sagði að árásin sem hófst í dag væri ekki "bestu fréttir" sem þeir hefðu fengið þessa vikuna.