Barcelona steinlá fyrir Atletico

Eiður Smári Guðjohnsen og félagar í Barcelona misstigu sig illa í toppbaráttunni á Spáni í kvöld þegar þeir fengu 4-2 skell gegn Atletico í Madrid. Á sama tíma vann Real Madrid 3-2 sigur á Recreativo á útivelli.

Það var reyndar Barcelona sem náði forystunni í leiknum með stórkostlegu marki Ronaldinho úr hjólhestaspyrnu, en heimamenn skoruðu tvívegis fyrir hlé og bættu við öðrum tveimur á 62. og 71. mínútu.

Eiður Smári Guðjohnsen spilaði síðasta hálftímann í leiknum og átti þátt í því þegar Samuel Eto´o minnkaði muninn fyrir Barcelona.

Robinho var í stuði fyrir Real í 3-2 sigrinum á Recreativo og skoraði tvívegis, en þrjú rauð spjöld fóru á loft í leiknum - þar meðal eitt á Sergio Ramos hjá Real.

Þá vann Deportivo nokkuð óvæntan sigur á Sevilla 2-1.