Óbreyttir stýrivextir í Japan í skugga gengisfalls

Japanski seðlabankinn ákvað í dag að halda stýrivöxtum óbreyttum í 0,5 prósentum þrátt fyrir lausafjárþurrð og mikla gengislækkun í kauphöllinni í Tókýó upp á síðkastið.

Fjármálasérfræðingar spáðu flestir þessari niðurstöðu.

Í rökstuðningi bankastjórnarinnar segir, að reiknað sé með hægari hagvexti á þessu ári en áður hafði verið gert ráð fyrir enda verðbólga að aukast á sama tíma og fasteignamarkaðurinn kólni. Þá er óttast að samdráttur í einkaneyslu í Bandaríkjunum geti komið harkalega niður á japönskum útflutningsfyrirtækjum.

Breska ríkisútvarpið bætir því við að þetta sé síðasti vaxtaákvörðunarfundur Toshihiko Fukui, seðlabankastjóra, en hann lætur af störfum eftir hálfan mánuð.

Gengi hlutabréfa lækkaði talsvert við lokun markaða í Japan í morgun en Nikkei-vísitalan féll um 3,3 prósent þegar fjárfestar seldu mikið magn hlutabréfa í þarlendum útflutningsfyrirtækjum, að sögn BBC.

Stýrivextir í Japan eru með því lægsta í heimi. Þeir voru núllstilltir í kjölfar efnahagslægðar sem gekk yfir Asíu árið 1997. Þeir hafa verið hækkaðir í tvígang frá því um mitt sumar 2006 um 25 punkta í hvort sinn.