Eiður Smári í leikmannahópi Börsunga

Eiður Smári Guðjohnsen verður í leikmannahópi Barcelona sem mætir Valencia í spænsku bikarkeppninni annað kvöld.

Um er að ræða síðari viðureign liðanna í undanúrslitum keppninnar en þeirri fyrri lauk með 1-1 jafntefli á heimavelli Börsunga.

Eiður var í byrjunarliði Barcelona gegn Almería í spænsku úrvalsdeildinni um helgina. Hann fékk högg undir lok leiksins og varð að fara af leikvelli en hann hefur nú jafnað sig á ný.

Ronaldinho var ekki með um helgina en hann hefur ekki æft með liðinu í þessari viku. Hann er ekki heldur í hópnum að þessu sinni en samkvæmt fregnum frá Spáni á hann ekki við meiðsli að stríða þessa stundina.

Hópur Barcelona: Valdés, Pinto, Zambrotta, Milito, Puyol, Thuram, Abidal, Sylvinho, Touré Yaya, Edmílson, Xavi, Iniesta, Eiður Smári, Bojan, Henry og Eto'o.