Barcelona á sigurbraut á ný

Barcelona vann í dag 4-1 sigur á Real Valladolid í spænsku úrvalsdeildinni en liðið tapaði fyrir Valencia í spænsku bikarkeppninni á fimmtudaginn.

Eiður Smári Guðjohnsen var ekki í byrjunarliði Börsunga í dag en hann kom inn á sem varamaður og lék síðustu 25 mínútur leiksins.

Það var Samuel Eto'o sem skoraði fyrsta mark leiksins á 23. mínútu eftir undirbúning Bojan Krkic en gestirnir jöfnuðu metin úr vítaspyrnu aðeins sjö mínútum síðar. Jonathan Sesma var þar að verki eftir að Lilian Thuram var dæmdur brotlegur í vítateig Barca.

Þannig stóðu leikar í hálfleik en Börsungar náðu forystunni á nýjan leik með marki úr fyrstu sókn sinni í seinni hálfleik. Iniesta skoraði þetta mark, aftur eftir undirbúning Bojan.

Eiður Smári kom inn á á 62. mínútu og stuttu síðar kom þriðja markið. Xavi átti aukaspyrnu inn á teig gestanna þar sem boltinn barst til Bojan sem skoraði sjálfur þriðja markið.

Hann bætti svo því fjórða við á 84. mínútu eftir að Eto'o hafði leikið á varnarmann Valladolid og rennt boltanum fyrir markið þar sem Bojan skoraði af stuttu færi. Hann átti því þátt í öllum fjórum mörkum Börsunga í dag.

Real Madrid mætir Valencia í dag klukkan 18.00 og kemur þá í ljós hvort að liðið nær að endurheimta sjö stiga forystuna sem það hafði á Börsunga fyrir leiki dagsins.

Önnur úrslit í dag:

Levante - Villarreal 1-2

Real Murcia - Espanyol 4-0

Osasuna - Betis 0-1

Racing - Recreativo 2-0

Zaragoza - Almeria 1-1