Mishkin seðlabankastjóri segir upp

Frederic Mishkin, einn af seðlabankastjórum bandaríska seðlabankans, hefur sagt upp hjá bankanum og ætlar að snúa sér að kennslustörfum á ný í vetur. Mishkin skrifaði skýrslu um íslensk efnahagsmál fyrir tveimur árum.

Hann hefur þegar afhent uppsagnarbréf sitt og hyggst snúa aftur til starfa við Columbia-háskóla, að sögn fréttastofu Reuters sem vitnar til heimildarmanns nátengdum bankastjóranum.

Mishkin var prófessor í hagfræði við skólann áður en hann settist í stól seðlabankastjóra vestanhafs. Í síðustu bankakreppu hér á landi á vordögum 2006 skrifaði hann skýrslu um íslensk efnahagsmál ásamt dr. Tryggva Þór Herbertssyni, þá forstöðumanni Hagfræðistofnunar Háskóla Íslands. Tryggvi er nú forstjóri Askar Capital.