Breiðavíkurdrengir á kvikmyndahátíð

„Við eigum von á því að í hópinn bætist félagar úr sambærilegum samtökum á Norðurlöndum og Breiðavíkursamtökin eru hér," segir Ari Alexander kvikmyndagerðarmaður.

Á laugardag verður kvikmyndahátíðin Nordisk Panorama haldin í Malmö en þar er keppt í flokki stuttmynda og heimildarmynda þar sem tvær myndir verða sýndar, Kjötborgin og svo Syndir feðranna eftir Bergstein Björgúlfsson og Ara. Þeir fylgja mynd sinni eftir sem og Bárður Ragnar Jónsson, formaður Breiðavíkursamtakanna, og Georg Viðar Björnsson.

Í flokknum eru ellefu norrænar heimildarmyndir og Ari, sem nú er í stjórn Breiðavíkursamtakanna, gerir sér vonir um að nokkurt hópefli myndist þegar „Breiðavíkurdrengir" frá Noregi, Svíþjóð og Finnlandi, mæta á staðinn. „Við ætlum að nota tækifærið og vekja athygli á málstað samtakanna. Nei, Syndir feðranna er ekki áróðursmynd. En áður en ég vissi var ég farinn að standa með drengjunum og vil fylgja þessu máli eftir," segir Ari.

Hann vinnur nú að framhaldi myndarinnar, segir ekki annað hægt en fylgja þessu eftir. „Ég mun fylgja þessu eftir þar til málinu er lokið með bótum eða skaðabótamáli gegn ríkinu."