Þór mun væntanlega leysa tvo leikmenn undan samningi

Þór á Akureyri mun væntanlega losa tvo af þeim þremur erlendu leikmönnum sem eru á mála hjá félaginu undan samningum á næsta sólarhring.

Hrafn Kristjánsson, þjálfari Þórs, sagði í samtali við Vísi að boðað hafi verið til fundar stjórnar í kvöld þar sem ákvörðun verður endanlega tekin.

Hann segir það mikilvægt fyrir félagið að halda Cedric Isom leikstjórnanda. „Það yrði okkar leikmönnum og félaginu til heilla að halda Isom frekar en að láta hann fara," sagði Hrafn.

Hinir leikmennirnir sem hér um ræðir eru þeir Roman Moniak sem lék með Hamar og ÍR í fyrra og Milorad Damjanac.