VG auglýsa eftir meðmælendum á netinu

Vinstri grænir auglýsa eftir meðmælendum með framboðslistum á vefsíðu sinni. Langt sé í land og lítill tími til stefnu.

Vinstri græn njóta mikils stuðnings samkvæmt skoðanakönnunum þessa dagana. Mælast stundum næst stærsti flokkurinn og yfir 25 prósenta fylgi. Samkvæmt lögum um kosningar til Alþingis þarf tiltekinn fjöldi fólks að mæla með framboðslista. Fjöldi meðmælenda er fundinn út eftir því hversu margir þingmenn eru í kjördæmi. Það þurfa til að mynda að lágmarki þrjú hundruð manns að mæla með lista í kjördæmi með tíu þingmönnum. Vinstri grænir auglýsa eftir meðmælendum á vefsíðu sinni.

Þar segir: „Eigi Vinstri græn að bjóða fram til Alþingis í vor þarf að safna nokkur hundruð undirskriftum í hverju kjördæmi. Enn er þó nokkuð langt í land og lítill tími til stefnu."

Síðan er skorað á alla sem vettlingi geta valdið að fá samstarfsfólk, vini og vandamenn til að skrifa undir og skila. Undirskriftir vanti í öll kjördæmi nema reykjavík norður, sérstaklega vanti margar undirskriftir í suðurkjördæmi og norðvesturkjördæmi.

Einn umsjónarmaður meðmælendalistanna sagði við fréttastofu að sér þætti þetta aðallega vera eitthvert stress hjá sínu fólki. Finnur Dellsén, miðlægur kosningastjóri vinstri grænna, segir að listarnir séu teknir alvarlega, ekkert stress sé á ferð, meðmælin séu komin að mestu í flestum kjördæmum.