Gunnar: Það var sama hvaða varnir þeir reyndu í dag

Gunnar Magnússon, þjálfari HK, var mjög ánægður með tíu marka sigur á Gróttu í Digranesi í kvöld. HK gerði út um leikinn í kringum hálfleikinn þegar þeir unnu fimmtán mínútna kafla 9-2 og komust 19-12 yfir.

„Þetta var frábær leikur hjá okkur. Við vorum aðeins lengi í gang og þá sérstaklega varnarlega þar sem við vorum búnir að fá á okkur tíu mörk eftir 20 mínútur. Síðustu 40 mínúturnar voru hinsvegar frábærar og ég var þá mjög ánægður með liðsheildina. Vörnin var frábær og Bubbi var magnaður fyrir aftan í markinu. Það small allt saman," sagði Gunnar.

Gróttumenn reyndu að klippa Valdimar Þórsson úr leiknum í fyrri hálfleik en á sama tíma lék Ólafur Víðir Ólafsson lausum hala og HK-ingum tókst að opna mikið fyrir þá Ragnar Hjaltested og Jón Björgvin Pétursson á hægri vængnum. Valdimar fór síðan á flug þegar HK-liðið stakk Gróttumenn af í seinni hálfleik.

„Við vorum búnir að æfa það vel þegar Valdimar var klipptur út og við leystum allar þeirra varnir. Við vorum búnir að þraulæfa þetta allt saman og það var allt klárt. Það vara sama hvaða varnir þeir reyndu í dag, við leystum það allt saman. Sóknarleikurinn hjá okkur var frábær og við komum algjörlega í veg fyrir þeirra hraðaupphlaup," sagði Gunnar.

„Við erum hægt og rólega að bæta okkur. Við vissum það alveg að þetta tæki tíma með nýtt lið. Við vissum að við myndum ekki toppa í september eða október. Við erum hægt og rólega að bæta okkur, við erum að þjappa okkur saman sem sterkari liðsheild og það eru fleiri menn að taka ábyrgð og annað," sagði Gunnar en HK komst upp í 4. sætið með þessum sigri.

„Þetta var mikilvægur sigur því þetta var spurning um að vera þremur stigum á eftir Gróttu eða einu stigi á undan. Þetta var mjög mikilvægur leikur og nú erum við öryggir með fimmta sætið," sagði Gunnar að lokum.