Benedikt: Jakob verður flottur í kvöld

Benedikt Guðmundsson, þjálfari KR, segir að liðið sé ekki með áskrift að sigri á heimavelli sínum þar sem liðið mætir Grindavík í kvöld.

Þriðji leikur liðanna í rimmunni um Íslandsmeistaratitilinn verður háður klukkan 19.15 í kvöld og verður í beinni útsendingu á Stöð 2 Sporti. Staðan er 1-1 og segir Benedikt leikinn í kvöld skipta afar miklu máli.

„Þetta er eins og í fótboltanum. Maður sér þar oft að þriðja markið er það mikilvægasta. Ég held að leikurinn í kvöld gæti gert mikið fyrir sigurliðið."

Hann segir þó að tapliðið sé þó ekki úr leik. „Alls ekki. Það er bara þægilegra að komast í 2-1 forystu. Við þekkjum það þó vel að lenda undir eins og gerðist oft þegar við urðum meistarar fyrir tveimur árum. Þá lentum við undir og náðumað koma til baka. Við vitum því að þó það komi sigur í kvöld er rimman ekki búin."

KR hefur unnið alla sína heimaleiki í vetur en Benedikt segir að það gefi mönnum lítið í forgjöf í kvöld. „Heimavöllurinn einn og sér mun ekki klára þetta fyrir þig. Við erum nú að spila a móti sterkasta liðinu og það mun ekki duga einhver miðlungsleikur þó það hafi oft dugað gegn einhverjum liðum fyrr í vetur."

Hann segir sína menn vera vel stemmda fyrir kvöldið. „Við erum búnir að fara yfir síðasta leik og reyna að fínpússa það sem fór úrskeðis þar."

Jakob Örn Sigurðuarson hefur haft hægt um sig í fyrstu tveimur leikjunum en Benedikt hefur ekki áhyggjur af honum. „Hann verður flottur í kvöld. Hann er búinn að vera rólegur en ég veit að hann ætlar sér mun meira."

Hann segir það mikilvægt að halda skyttum Grindavíkur í skefjum í kvöld. „Við þurfum sérkstaklega að hafa hemil á Brenton. Við þurfum líka að fara betur með boltann en í síðasta leik. Alltaf þegar við vorum við það að ná þeim köstuðum við boltanum frá okkur. Við vorum að gera ýmis mistök í þeim leik sem sjást ekki oft hjá okkur."