Davíð sigraði Golíat

Hnefaleikakappinn David Haye hafði í nótt betur gegn Rússanum risavaxna Nikolay Valuev í bardaga þeirra um WBA-heimsmeistaratignina í þungavigt.

Haye er ekki lítill maður. Hann er 190 sentimetrar en samt 23 sentimetrum minni en Valuev og 45 kílóum léttari.

Haye nýtti sér þó hraðann sinn og hleypti í raun Valuev aldrei nalægt sér allan bardagann. Hann komst meira að segja nálægt því að slá Rússann niður í tólftu og síðustu lotunni.

Haye vann þó á stigum að lokum. Tveir af þremur dómurum gáfu Haye fleiri stig en sá þriðji gaf báðum jafn mörg stig.

Hann er fyrsti Bretinn sem verður heimsmeistari í þungavigt síðan að Lennox Lewis hætti árið 2003. Haye hóf feril sinn í næsta þyngdarflokki fyrir neðan, cruiserweight, og er aðeins annar maðurinn í sögunni sem verður sem nær titli í þungavigt eftir að hafa fært sig upp um flokk. Hinn er Evander Holyfield.

„Síðan ég var lítið barn hefur mig dreymt um að verða heimsmeistari í þungavigt," sagði Haye eftir bardagann. „Ég barðist í kvöld við stærsta þungavigtarmeistarann og hann leit út eins og viðvaningur. Fólk dró hæfileika mína í efa en ég gerði nóg til að vinna."