Frábær endurkoma hjá Mosley

Bandaríkjamaðurinn Shane Mosley átti frábæra endurkomu í hnefaleikahringnum í gærkvöld þegar hann vann sigur á Mexíkóanum Antonio Margarito í níu lotum í Los Angeles.

Hinn 37 ára gamli Mosley var mjög frískur í bardaganum og var rétt búinn að koma Margarito í gólfið í áttundu lotu, en þegar hann lét svo höggin dynja áfram í þeirri níundu, átti dómarinn ekki annara kosta völ en að stöðva bardagann.

Mosley er hirti þarna WBA beltið í veltivigt og er þetta í fjórða sinn sem hann verður heimsmeistari. Hann á að baki 46 sigra í 51 bardaga og tapaði ekki lotu í bardaganum í nótt fyrir framan rúmlega 20 þúsund áhorfendur í Staples Center.