Panucci ætlar ekki að spila aftur með landsliðinu

Varnarmaðurinn Christian Panucci segir það ekki koma til greina að spila aftur með ítalska landsliðinu. Skipti engu þó hann verði valinn í hópinn fyrir HM næsta sumar.

„Þegar deildin er búin 16. maí þá er ég farinn í frí. Þó svo ég verði valinn í landsliðshópinn þá ætla ég mér að vera í fríi hinum megin á hnettinum," sagði Panucci sem leikur með Parma í dag.

Panucci grínaðist svo í blaðamönnum með að hann gæti spilað með enska landsliðinu en hann og Fabio Capello hafa lengi átt gott samband.

„Þeir vilja ekki gefa mér enskt vegabréf og því hef ég spilað minn síðasta landsleik," sagði Panucci og brosti.