Haye óþreyjufullur að mæta Klitschko-bræðrum

Eftir að breski hnefaleikakappinn David Haye þurfti að draga sig út úr bardaga gegn Wladimir Klitschko um miðjan júní vegna meiðsla hefur gengið illa hjá honum að skipuleggja annað tækifæri í hringnum gegn annað hvort Wladimir eða Vitali Kitschko. Haye átti upphaflega að mæta Vitali um miðjan júní en Wladimir hljóp í skarðið fyrir bróður sinn áður en Haye varð svo að hætta við.

Haye hefur líst því yfir að hann ætli sér að vinna báða Klitschko-bræðurna og sé tilbúinn að mæta þeim hvar og hvenær sem er.

„Okkur er alveg sama hvar bardaginn verður haldinn svo framarlega sem boðið verði upp á hnefaleikahring. Það er mikill vilji af okkar hálfu en lítið að gerast í þessu í augnablikinu," segir Adam Booth þjálfari Haye um möguleikann á að Haye mæti bræðrunum.

Bræðurnir eru sagðir komnir með nóg af yfirlýsingagleði Haye en sögusagnir herma þó að Vitali sé hugsanlega tilbúinn að mæta Haye á nýjum leikvangi Shakhtar Donetsk í Úkraínu í september á þessu ári.