Real ætlar að kaupa Ribery á næsta ári - búið að semja við leikmanninn

Spænskir fjölmiðlar greina frá því í kvöld að Real Madrid sé búið að gera samkomulag við franska landsliðsmanninn Franck Ribery um að hann komi til liðsins næsta sumar en hann er nú leikmaður Bayern Munchen.

Alain Migliaccio, umboðsmaður Ribery, er samkvæmt þessum fréttum búinn að gera fimm ára samning við Real en Zinedine Zidane var fulltrúi Real Madrid í viðræðunum. Zidane er einnig góðvinur Ribery og hefur verið lykilmaður í að koma þessum samningi á laggirnar.

Spænska blaðið AS segir að samningur þessi sé að mörgu leiti svipaður og samningurinn sem Real Madrid gerði við Cristiano Ronaldo árið 2008. Real Marid endaði síðan ferlið með að kaupa Ronaldo frá Manchester United í sumar á 94 milljónir evra.