Eiður Smári enn óviss með framtíð sína hjá Barca

Landsliðsframherjinn Eiður Smári Guðjohnsen viðurkennir í samtali við Sky Sports fréttastofuna að hann sé óviss um framtíð sína hjá Barcelona og segir að aðeins tíminn leiði í ljós hvað muni gerast í hans málum.

„Ég get hvorki staðfest að ég verði áfram né að ég fari frá Barcelona. Aðeins tíminn mun leiða í ljós hvað verður. Eins og staðan er í dag þá er ég leikmaður Barcelona en eins og allir vita geta hlutirnir breyst mjög fljótt í boltanum," segir Eiður Smári.

Eiður Smári útilokar alls ekki endurkomu í enska boltann þar sem hann átti góð ár með Bolton og Chelsea.

„Ég horfi aftur til tíma míns á Englandi með hlýjum huga. Þetta var frábær tími og ég á mjög góðar minningar frá tíma mínum þar. Hvort ég snúi aftur þangað er ómögulegt að segja en við sjáum til hvað gerist."