Haye kemur óorði á hnefaleika

Hnefaleikarinn Wladimir Klitschko segir að mótherji hans David Haye frá Bretlandi sé íþróttinni til skammar vegna hegðunar sinnar og yfirlýsinga í aðdraganda bardaga þeirra í júní.

Haye vakti mikla athygli í London á dögunum þegar hann mætti á blaðamannafund í bol sem á var prentuð skopmynd af honum að afhausa þá Klitschko-bræður, Wladimir og Vitali.

Haye segist ætla að rota þá báða og verða besti þungavigtarhnefaleikari heimsins, en hann kemur úr léttari þyngarflokkum.

Wladimir virðist vera búinn að fá nóg af stælunum í Bretanum. "Hvað ætlar hann að gera næst? Skera hausinn af mömmu minni og pabba? Mun hann ráðast á trúarbrögð mín eða kynþátt minn? Það er truflandi að sjá svona framkomu. Þetta er ekki íþróttamennska," sagði Úkraínumaðurinn.

Bardagi þeirra félaga fer fram á Veltins Arena, heimavelli knattspyrnuliðsins Schalke, þann 20. júní í sumar. Lundúnabúinn Haye var ekki í vandræðum með að svara kvörtunum Klitschko á blaðamannafundi í dag.

"Það er stíllinn þinn sem er til skammar. Allt sem þú gerir í hringnum er til skammar," sagði Haye við mótherja sinn og tók svo til við að upphefja sig á kostnað andstæðingsins.

"Stungan hans og það hvernig hann hangir á andstæðingunum er ekki fallegur stíll og það virkar ekki gegn mér. Ég mun láta hann berjast og það kann hann ekki við. Hann er auli og mér geðjast ekki að stílnum hans. Hann er leiðinlegur boxari. Ég fer inn í hringinn til að skemmta fólki - ég bý mig undir stríð eins og sannur þungavigtarmaður," sagði Haye.