Toni gæti verið á leið til Mílanó

Ítalski framherjinn hjá FC Bayern, Luca Toni, útilokar ekki að snúa aftur til heimalandsins þar sem vitað er að bæði Mílanó-liðin hafa mikinn áhuga.

Þessi fyrrum framherji Fiorentina hefur átt tvö góð ár í herbúðum Bayern þar sem hann hefur skorað tæplega 60 mörk.

Bayern hefur í sumar fengið Mario Gomez frá Stuttgart og svo er félagið sagt vera á höttunum eftir Goran Pandev hjá Lazio. Það ríkir því óvissa um framtíð hins 32 ára gamla Toni.

Sjálfur segist Toni vera til í að koma aftur heim og sérstaklega ef hann horfir fram á að spila minna en áður. Hann segist jafnvel vera til í að spila fyrir minni pening heima enda sé mikilvægt að fá að spila næsta vetur þar sem HM sé framundan.