Mótherjar Liverpool skipta um þjálfara - Dan Petrescu hættur

Dan Petrescu mun ekki stýra liði Unirea Urziceni þegar það mætir Liverpool í 32 liða úrslitum Evrópudeildarinnar á næsta ári. Mihai Stoica, framkvæmdastjóri Unirea Urziceni, tilkynnti þetta í gær og sagði að félagið væri að leita að nýjum þjálfara.

„Við munum skoða það hvaða þjálfarar eru í boði. Við viljum helst fá erlendan þjálfara til að taka við liðinu," sagði Mihai Stoica í sjónvarpsviðtali.

Dan Petrescu gerði Unirea að rúmenskum meisturum í fyrsta sinn á síðasta tímabili og liðið var einnig mjög nálægt því að komast í sextán liða úrslit Meistaradeildarinnar. Liðið er eins og er í 2.sæti í rúmensku deildinni með jafnmörg stig en slakari markatölu en CFR Cluj.