Forlan framlengir við Atletico Madrid til ársins 2013

Atletico Madrid hefur byrjað afleitlega í spænsku úrvalsdeildinni á þessu tímabili og er sem stendur í þriðja neðsta sæti. Stuðningsmenn félagsins geta þó glaðst yfir því að framherjinn Diego Forlan hefur ákveðið að framlengja samning sinn við félagið til ársins 2013.

Hinn þrítugi Forlan fór á kostum á síðusta keppnistímabili með Atletico Madrid og skoraði þá 32 mörk í deildinni og var í kjölfarið orðaður við stórliðin Real Madrid og Barcelona.

Forlan vonast nú til þess að hjálpa Atletico Madrid til þess að rétta úr kútnum undir nýja knattspyrnustjóranum Quique Sanchez Flores sem tók við liðinu í síðasta mánuði.

„Það er draumi líkast að ég sé búinn að framlengja samning minn við Atletico Madrid og ég er sannfærður um að það sé bjart framundan hjá liðinu og ég er ákveðinn í því að vinna titla með félaginu á næstu árum," segir Forlan í viðtali á opinberri heimasíðu liðsins.