Finnst gaman að ögra

Ég fór að safna hári í vor því kærastan mín hvatti mig til þess. Ég ætla að safna aðeins síðara en stefni samt ekki á neitt rokkhár," segir sjónvarpsmaðurinn Sölvi Tryggvason þegar Fréttablaðið forvitnast um sléttgreiddan lubbann sem hann hefur sést með á skjánum undanfarið.

„Daginn sem ég verð þreyttur á þessu þá klippi ég mig," bætir Sölvi við og vill ekki viðurkenna að hann sé að eltast við tískustrauma, en vatnsgreitt hár til hliðar hefur sést á höfðum Hollywood-stjarna og á tískupöllunum á árinu.

„Ég er ekki að reyna að vera eins og þessi eða hinn. Það er frekar að ég setji stílinn fyrir aðra," segir hann og hlær. „Ég hef gaman af því að prófa mig áfram, bæði í fötum og hári, og ögra sjálfum mér aðeins. Til dæmis hef ég verið í fjólubláum jakkafötum í þættinum mínum! Ég sæi ekki Loga Bergmann eða Simma Guðmunds hafa það af," segir Sölvi og skellir upp úr.

„Nei nei, í vinnunni reyni ég bara að vera snyrtilegur og vel klæddur. Um leið og útlitið dregur athyglina frá því sem er verið að segja er maður kominn í vandræði. Kannski er ég að gera það með hárinu á mér! En ef fólk er ánægt með sjálft sig þá ber það allt vel, sama hvort það er hárgreiðsla eða föt."

heida@frettabladid.is