Benítez: Menn lögðu sig alla fram

Rafael Benítez, stjóri Liverpool, segist sjá framfarir á sínu liði þrátt fyrir að það hafi tapað 1-0 fyrir Lille í kvöld.

Þetta var fyrri leikur liðanna í sextán liða úrslitum Evrópudeildarinnar.

„Ég er ósáttur við úrslitin en ánægður með framlag leikmanna. Við getum unnið öll lið á góðum degi á Anfield. Ég væri með áhyggjur ef menn hefðu ekki lagt sig svona fram í kvöld," sagði Benítez. „Á heimavelli höfum við magnaðan stuðning, það eru enn eftir 90 mínútur af þessu einvígi. Lille er gott lið, með flotta leikmenn sem geta skapað mikla hættu. Við töluðum um það fyrir leikinn að leggja okkur fram og valda stuðningsmönnum ekki vonbrigðum. Okkur tókst það að mínu mati."

„Allir leikir eru mikilvægir fyrir okkur núna. Næst er komið að leik gegn Portsmouth og svo hugsum við út í seinni leikinn," sagði Benítez.