Gerrard: Stjórinn bað mig að hjálpa til

Hetja Liverpool í kvöld, Steven Gerrard, var hógvær eftir sigurinn á Napoli í kvöld þar sem hann skoraði frábæra þrennu í síðari hálfleik og tryggði Liverpool 3-1 sigur.

"Við lentum marki undir og stjórinn bað mig að koma af bekknum og hjálpa liðinu. Ég gerði það en allir strákarnir í liðinu voru frábærir," sagði Gerrard eftir leikinn.

Fyrsta markið hans var skrautlegt en hann komst þá inn í sendingu varnarmanns Napoli til markvarðar og skoraði. Hann var rétt á undan markverðinum í boltann.

"Það var ekkert annað að gera en að vaða í boltann þarna. Þetta hafði ekkert með gæði að gera. Bara ákveðni og löngun í boltann. Markvörðurinn hafði ekki sömu löngun."