Evrópudeildin: Liverpool tapaði í Frakklandi

Liverpool lék í kvöld fyrri leik sinn gegn Lille í sextán liða úrslitum Evrópudeildarinnar. Leikurinn sem fram fór í Frakklandi endaði með 1-0 sigri heimamanna í Lille.

Steven Gerrard var aðeins skugginn af sjálfum sér í leiknum gegn Wigan á mánudag og hann hélt áfram að valda vonbrigðum í kvöld.

Eina mark leiksins kom sex mínútum fyrir leikslok. Eden Hazard tók aukaspyrnu sem gestirnir misreiknuðu illilega og boltinn sigldi í netið. Stuttu síðar hefði Lille getað skorað annað mark en boltinn fór þá í stöngina. Ekki er víst að þetta eina mark sé nægt veganesti fyrir Lille í seinni leikinn á Anfield sem fram fer eftir viku.

Þremur öðrum leikjum í keppninni var einnig að ljúka. Ruud van Nistelrooy var meðal markaskorara Hamburger sem vann Anderlecht 3-1.

Lille - Liverpool 1-0

1-0 Hazard (84.)

Atletico Madrid - Sporting Lissabon 0-0



Hamburger - Anderlecht 3-1

1-0 Mathijsen (23.), 2-0 Nistelrooy (40.), 2-1 Legear (45.), 3-1 Jarolim (76.)

Rubin Kazan - Wolfsburg 1-1

1-0 Noboa (29.), 1-1 Misimovic (67.)