Ranieri óttast ekki um starf sitt

Þó svo ítalskir fjölmiðlar keppist við að greina frá því að Claudio Ranieri verði rekinn frá Roma fyrr frekar en síðar heldur þjálfarinn því enn fram að hann sé öruggur í starfi.

Roma á heimaleik gegn Lecce um helgina og segja sumir fjölmiðlar að Ranieri sé einum tapleik frá því að vera rekinn.

"Ég hef alltaf staðið mig betur en forverar mínir hjá þeim félögum sem ég hef þjálfað. Þeir sem taka við af mér hafa síðan líka staðið sig verr," sagði Ranieri.

"Ég finn fyrir miklum stuðningi frá stjórn félagsins. Mér finnst ekki vera nein pressa á mér. Þeir sem hvetja stjórnina til þess að reka mig ættu að fara varlega því ég stend mig alltaf betur í næsta starfi."