Bandarískir aðilar vilja í Formúlu 1

Bandarískir aðilar hafa sótt formlega um að komast í Formúlu 1 á næsta ári og flagga m.a. Bandaríkjamanninum Jonathan Summerton sem ökumanni. Hann var einnig nefndur til sögunnar hjá USF1 liðinu sem sótti um fyrir þetta tímabil en allt fór handaskolum hjá þeim. Aðeins sex vikum fyrir tímabilið tilkynnti USF1 formlega að liðinu tækist ekki að mæta í mótaröðina og fékk sekt fyrir hjá FIA. Búnaður liðsins sem var með aðsetur í Charlotte var seldur á uppboði. Nú vilja aðrir aðilar taka við flaggi Bandaríkjanna og nokkrir starfsmenn sem höfðu verið ráðnir hjá USF1 virðast vera inn í myndinni hjá Cypher Group, sem hefur sótt um þátttöku 2011. Autosport.com greinir frá þessu í dag. Í yfirlýsingu frá Cypher segir að þegar hafi verið sótt formlega um aðild að Formúlu 1 og vonast eftir að verða 13 liðið á ráslínunni á næsta ári. Summerton er ökumaður sem hefur keppt í Formúlu 3 Evrópumótaröðinni og í A1 GP með bandarísku liði. Hann keppti í Atlantic mótaröðinni í fyrra og að hluta til í Indy Lights í Bandaríkjunum í fyrra. Nokkrir aðrir aðilar hafa sýnt þvi áhuga að komast að í Formúlu 1, og Episilon Euskadi, Stefan GP og Durango eru nefnd í frétt autosport.