Ekki á hverjum degi sem við fáum svona tilboð frá Real Madrid

Það lítur allt út fyrir það að Sami Khedira spili með spænska liðinu Real Madrid á næsta tímabili en yfirmaður íþróttamála hjá Stuttgart, Fredi Bobic, staðfesti þetta við þýska blaðið Bild í morgun.

Sami Khedira, sem er 23 ára gamall miðjumaður, sló í gegn með þýska landsliðinu á HM í Suður-Afríku í sumar en hann er með samning við Stuttgart til ársins 2011.

„Það er ekki á hverjum degi sem við fáum svona tilboð frá Real Madrid. Nú gengur þetta bara út á það að við og Real náum samkomulagi," sagði Fredi Bobic.

Fjölmiðlar hafa skrifað um það að Stuttgart vilji frá 15 milljónir evra fyrir Khedira en Real Madrid vill borga á bilinu 8 til 10 milljónir fyrir hann.

„Það er rétt að hann vill fara til Real. Hann er nú að fara yfir sín mál með forráðamönnum Stuttgart," sagði Jorg Neubauer umboðsmaður Sami Khedira.