Van Bommel: Luca Toni sofnaði á liðsfundi með Louis van Gaal

Mark van Bommel, fyrirliði Bayern Munchen, hefur sagt frá því að deilur ítalska framherjans Luca Toni og þjálfarans Louis van Gaal hafi hafist þegar Toni sofnaði á liðsfundi með Van Gaal síðasta sumar. Þetta gerist á öðrum degi Hollendingsins í starfi sem þjálfari Bayern.

Van Bommel segir að Van Gaal hafi orðið mjög reiður og þegar kallað Toni á fund upp á skrifstofu sína. Toni hætti síðan hjá Bayern á miðju tímabili og sagðist þá ekki getað unnið með Van Gaal. Toni var lánaður til ítalska liðsins Roma en hann á enn eftir eitt ár af samningi sínum við Bayern.

Van Bommel sagði frá þessu í viðtali við Bild og hann sagði að þótt að venjan væri að liðsfélagarnir styddu félaga sinn þá hafi engin stutt við bakið á Toni í þessu tilfelli.

Lusa Toni skoraði 38 mörk í 56 leikjum með Bayern 2007-08 og 2008-09 en lék aðeins 3 leiki á þessu tímabili áður en hann fór heim til Ítalíu.