Red Bull vill Vettel til ársins 2015

Red Bull liðið hefur áhuga á því að framlengja samning sinn við Sebastian Vettel til ársins 2015, en núverandi samningur rennur út 2012.

Liðið vill tryggja sér Vettel, þar sem líklegt er að önnur lið renni hýru auga til kappans vegna góðrar frammistöðu.

Autosport.com greinir frá þessu í dag og segir að viðræður séu þegar komnar í gang og að líkur séu á því að hönnuðurinn Adrian Newey verði líka áfram hjá liðinu.

Það er talið auka möguleika á viðveru Vettels áfram hjá liðinu, enda hefur bíll Red Bull verið góður á árinu. Helst að bilanir hafi hamlað framför á köflum.