Jónatan: Greddan var okkar megin

Jónatan Magnússon segir að Akureyringa hafi einfaldlega hungrað meira í sigur en FH-inga. Akureyri vann leik liðanna í kvöld 33-30.

Við ræddum fyrri hálfleikinn fyrst og hvort að Akureyri hefði ekki átt að vera búið að klára leikinn.

"Sex mörk er fínt í hálfleik. Maður gerir sér ekki alltaf grein fyrir því hvernig andstæðingurinn er að verja. Við skoruðum 18 mörk og vorum að spila fína vörn á meðan. Það var sex marka munur á hálfleikjunum, það var bara þannig."

"Við vissum að þeir myndu ekki verja svona lítið í seinni hálfleiknum. Þeirra möguleiki var á síðastu 10 mínútunum í seinni hálfleik og eftir þrjár mínútur var tveggja marka munur. Úr því sem komið var er ég ánægður með sigurinn og liðsheildina. Við erum að fá mörk úr öllum stöðum og Flóki var frábær.

Baráttan var frábær og það var sætt að vinna þetta."

"Mér fannst holningin á liðinu vera þannig að þetta var okkar leikur. Þetta var aldrei neitt hrun og okkur leið vel. Þeir áttu fínan kafla en ekki meira en það."

Líturðu á þetta sem hefnd gegn FH eftir þrjú töp á tímabilinu fyrir þennan leik.

"Það hefði verið ferlegt að tapa fjórða leiknum, og mæta þeim svo hugsanlega kannski í úrslitakeppninni. En greddan var okkar, okkur langaði hrikalega í þessi stig."

"Áhorfendur voru líka frábærir, það er gaman að fólki sé boðið og það er gaman að vinna stóru leikina, sem hefur ekki alltaf tekist hjá okkur. En núna brotnuðum við ekki og það var frábært fyrir framhaldið. Svo fáum við fullt hús næst líka," sagði fyrirliðinn Jónatan glaðbeittur, en hann skartar glæsilegri mottu þessa dagana í tilefni af Mottumars.