Federer ætlar sér 20 stóra titla

Roger Federer ætlar ekki að hætta að spila tennis fyrr en hann hefur unnið 20 stórmeistaratitla. Hann er kominn með sextán í safnið.

Federer er 29 ára gamall og því er líklegt að kappinn nái markmiði sínu.

"Ég tel að ég geti gert þetta af því ég hef unnið þrjá stóra titla á tímabili þrisvar sinnum og tvo titla í tvígang," segir Federer.

Svisslendingurinn hættir ekki strax en hann segir að hann sé að verða þreyttari og þreyttari eftir hvert mót en áður.

Fjögur stóru mótin eru opna franska, opna bandaríska, opna ástralska og Wimbledon mótið.