Zamora heldur áfram að þagga niður baulið

Bobby Zamora viðurkennir að brekkan sé ansi brött fyrir Fulham sem tekur á móti ítalska stórliðinu Juventus í Evrópudeildinni í kvöld. Juventus vann fyrri leikinn 3-1.

Zamora hefur mátt þola baul frá hópi stuðningsmanna Fulham í vetur en hefur náð að þagga niður í ansi mörgum með því að skora fimmtán mörk á tímabilinu.

„Ég hef náð að þagga niður í einum eða tveimur sem hafa verið að láta mig heyra það, ég sópa þessu bara undir teppið og reyni áfram að gera vel. Ég reyni að skora mörk og hjálpa liðinu," segir Zamora sem hefur verið í fínu formi að undanförnu.

„Þetta verður mjög erfiður leikur en við gerum okkar besta. Við erum alls ekki búnir að gefast upp, við höfum trú á því að við getum náð sögufrægum sigri fyrir félagið," segir Zamora.

Stöð 2 Sport sýnir leik Fulham og Juventus í kvöld.