Jón Gnarr þakkaði stuðningsmönnum sínum

„Ég hef alltaf haft það að leiðarljósi að reyna að gera eitthvað gott og uppbyggilegt með það sem ég hef verið að gera," sagði Jón Gnarr, oddviti Besta flokksins, þegar að hann ávarpaði stuðningsmenn sína á kosningavöku Besta flokksins í Iðusölum í kvöld.

Jón Gnarr sagði að það væri gaman að sjá mikið af glöðu og fallegu fólki saman komnu á kosningavökunni. „Mig langar alveg rosalega að þakka öllum sem að eru búnir að gera þetta mögulegt með því að baka kökur, skúra, hringja allskonar leiðinleg símtöl," sagði Jón. Hann sagðist jafnframt vilja þakka öllum þeim sem hefðu mætt fyrir sína hönd á „möppumessur".

Samkvæmt fyrstu tölum í Reykjavík er Besti flokkurinn með sex manns kjörna, Sjálfstæðisflokkurinn með fimm manns og Samfylkingin með fjóra.