Beckenbauer segir Bayern hafa áhuga á Bendtner

Franz Beckenbauer hefur gefið það í skyn að þýska stórliðið Bayern Munchen hafi áhuga á því að kaupa danska landsliðsframherjann Nicklas Bendtner frá Arsenal.

Bendtner hefur látið óánægju sína í ljós opinberlega vegna þess að hann fær lítið að spila hjá Arsene Wenger en stjóri Arsenal hefur þó gefið það út að Bendtner sé þó í framtíðarplönum hans.

„Bendtner er einn af leikmönnum sem hafa staðið sig vel með bæði landsliði og félagsliði og hefur hæfileika og getu til að spila í félagi eins og Bayern Munchen. Við höfum þegar fullt af klassaleikmönnum," sagði Beckenbauer við Daily Mirror.

Nicklas Bendtner var að glíma við meiðsli í upphafi tímabils en er búinn að skora 2 mörk í 4 leikjum með Arsenal-liðinu í öllum keppnum á þessu tímabili. Hann skoraði 12 mörk í 31 leik á síðasta tímabili.