Mót nærri miðborg New York í skoðun

Yfrmaður ferðamála í Jersey City, sem er í 15 mínúta fjarlægð frá miðborg New York hefur lagt fram hugmyndir um Formúlu 1 mót á sínu heimasvæði árið 2012. Mótssvæðið yrði þannig upp sett að miðborg New Yrok yrði í baksýn. Vefsetrið Autosport greinir frá þessu í dag. Jafnvel er verið að skoða að hafa mótið flóðlýst ef af verður, eins og í Singapúr. Umræða af þessu tagi hefur áður borið á góma, en búið er að leggja fyrstu drög að braut sem yrði 3.4 mílna löng. Bernie Ecclestone hefur mikinn áhuga á að halda Formúlu 1, með miðborg New York í nánd sem sterkasta svæðið til kynningar á íþróttinni sem hefur átt heldur erfitt uppdráttar í Bandaríkjunum og ekkert mót verið haldið þar síðustu misseri. Svæðið sem um ræðir er við Liberty State Park í Jersey og vilja þeir sem hafa áhuga á mótshaldinu að mótið beri nafið Jersey City að hluta til kynningar á svæðinu. Það eru þó ekki allir heimamenn hrifnir af því að mót verði haldið á svæðinu og einhverjir aðilar hafa mótmælt hugmyndinni bréflega til borgarstjóra. Borgarstjórinn í Jersey, segir að málið sé á frumstigi og ekkert sé víst að Formúla 1 sé þessu borgarsvæði fyrir bestu.