Vettel: Stoltur af sigrinum

Sebastian Vettel bætti stöðu sína í stigamóti ökumanna í Formúlu 1 í dag með sigri á Suzuka brautinni í Japan. Hann er með 206 stig, eins og Fernando Alonso, en Mark Webber er efstur með 220 stig. "Þetta var ótrúlegur dagur, að aka tímatökuna og ná besta tíma og ná svo hámarksárangri í mótinu. Bara frábært og liðið á þakkir skildar og menn hafa lagt mikið á sig", sagði Vettel á fréttamannafundi eftir keppnina. Vettel sagði að fjöldi starfsmanna Red Bull hefði lítið sofið frá fimmtudegi til laugardags og það hefði hentað vel að tímatökunni var frestað vegna veðurs á laugardag. Webber pressaði á Vettel af kappi í slagnum um fyrsta sætið, en hafði ekki erindi sem erfiði. "Hann reyndi að pressa mig, en ég vissi að það er erfitt að fara framúr á brautinni og ég keyrði eins hratt og mögulegt var. Ég fékk alltaf að vita stöðuna á milli mín og Fernando Alonso í mótinu. Ég sá oft í Mark þegar hann var fyrir aftan og vissi bilið." "Ég náði að stjórna keppninni eftir að Jenson Button tók þjónustuhlé (úr forystuhlutverkinu) um miðbik mótsins. Maður vill náttúrulega keyra sem hraðast í hverjum hring, því það er svo frábært á þessari braut. Þannig ég er bara ánægður", sagði Vettel glaðreifur. Vettel lék eftir árangur Mika Hakkinen og Michael Schumacher að vinna tvö ár í röð á Suzuka og þeir urðu báðir meistarar. En veit það á gott fyrir Vettel? "Gæti verið. Ég hefði ekkert á móti því. Ég er mjög stoltur. Elska þessa braut og alltaf sérstakt að koma hingað. Áhorfendur og stemmning hérna er sérstök. Þetta er í fyrsta skipti sem ég vinn sama mót í tvígang."