Scumacher spenntur vegna titilslagsins

Michael Schumacher hjá Mercedes er spenntur fyrir titilslag helgarinnar og þætti ekkert óeðlilegt ef Sebastian Vettel gefur eftir sæti til Mark Webber, liðsfélaga hans hjá Red Bull ef þörf krefur í titilslag fjögurra ökumanna. Lokamótið er í Abu Dhabi um helgina og fyrstu æfingar í dag.



Mikið hefur verið spáð í hvort Red Bull muni hagræða úrslitum varðandi ökumenn sína, til að eiga sem mesta möguleika, en eigandi fyrirtækisins og framkvæmdarstjóri hafa tekið fyrir slíkt síðustu daga. Hver sem raunin verður þegar á hólminn er komið og hvort Vettel sjálfur ákveður að gefa eftir sæti, verði hann á undan Webber. Aðspurður um hvort slíkt væri ósanngjarnt sagði meistarinn sjöfaldi, Schumacher;

"Það fer eftir því hvað menn sjá sem ósanngjarnt og ekki. Er ósanngjarnt að vinna keppni, ef þú ert fljótari? Ég er ekk viss um að hægt sé að tala um að það sé ósanngjarnt. Við verðum allir spenntir að sjá hvað gerist, líka frá mínum bæjardyrum séð af því ég veit ekki hvað hann (Vettel )er að hugsa", sagði Schumacher í frétt á autosport.com.

Frægt varð á þessu ári þegar Felipe Massa hleypti Fernando Alonso framúr sér og gaf eftir mögulegan sigur. Alonso fékk þannig 7 stigum meira en ella og stendur því best að vígi í lokamótinu, 8 stigum á undan Webber, en 15 á undan Vettel.

"Þetta er mjög áhugavert fyrir okkur alla frá ólíkum sjónarhóli. Það hefur ekki verið svona harður slagur og ég hef aldrei séð þrjá til fjóra mögulega meistara, að ég held. Það hefur gengið upp og niður og óvænt atvik gerst. Þetta er búið að vera áhugavert og spennandi að sjá hvað gerist í lokamótinu."

"Ég get ímyndað mér hvað er í gangi í hugum keppenda. En hver vinnur titilinn? Ég myndi ekki vilja veðja um það. Ég er bara ánægður að við erum búnir að laga okkar bíl til og ég er þokkalega ánægður með hann og hlakka til framhaldsins", sagði Schumacher.

Sýnd verður samantekt frá fyrstu æfingum í Abu Dhabi á Stöð 2 Sport kl. 21.00 í kvöld.