Brady orðinn launahæstur í NFL-deildinni

Leikstjórnandi New England Patriots, Tom Brady, er búinn að samþykkja nýjan fjögurra ára samning við félagið sem gerir hann að launahæsta leikmanni NFL-deildarinnar.

Samningurinn er sagður færa Brady 72 milljónir dollara á samningstímanum ef vel gengur. Hann fær þó að lágmarki 48 milljónir dollara.

Það þýðir að hann fær 18 milljónir dollara að meðaltali á ári og tekur þar með fram úr Eli Manning, leikstjórnanda NY Giants, sem launahæsti leikmaðurinn. Manning er að fá 16 milljónir á ári.

Brady verður þó tæplega launahæsti leikmaður deildarinnar lengi því Peyton Manning, leikstjórnandi Indianapolis Colts, er í samningaviðræðum við sitt félag þar sem núverandi samningur hans rennur út eftir tímabilið.

Peyton er að fá 15,7 milljónir dollara á ári og mun líklega fara upp fyrir Brady er hann skrifar undir nýjan samning.