Valur bikarmeistari karla

Valsmenn urðu í dag bikarmeistarar karla í þriðja sinn á fjórum þegar þeir unnu dramatískan sigur á Akureyri, 24-26. Leikurinn var æsispennandi allt til loka.

Fyrri hálfleikur var afar líflegur. Bæði lið bættu geysilega grimm til leiks, keyrðu upp hraðann svo skemmtanagildi leiksins var mikið.

Akureyringar höfðu tökin framan af en um miðjan hálfleik kom góður kafli hjá Valsmönnum og þeir komust yfir í fyrsta skipti, 10-11, og héldu þessu eins marks forskoti fram að hálfleik en þá var staðan 13-14.

Markverðir beggja liða, Sveinbjörn og Hlynur, vörðu virkilega vel í hálfleiknum. Heimir Örn og Bjarni Fritzson fóru fyrir sóknarleik Akureyringa en Finnur Ingi fór mikinn hinum megin sem og Sturla.

Jafnræðið hélt áfram í síðari hálfleik. Mikil átök, fínar vörslur og allt í hers höndum. Afar líflegir áhorfendur í Höllinni létu vel í sér heyra enda frábær leikur.

Valur náði þriggja marka forskoti, 21-24, þegar tíu mínútur voru eftir af leiknum og voru þess utan manni færri. Þegar þeir gátu náð fjögurra marka forskoti átti Valdimar Þórsson afar óskynsama sendingu inn á línu, henni var stolið, Akureyri refsaði og kom sér aftur inn í leikinn. Illa farið með góða stöðu þar hjá Valsmönnum.

Spennan var algjörlega rafmögnuð á lokamínútum leiksins. Akureyri fékk tækifæri til þess að jafna á lokamínútunni en Hlynur Morthens varði þá skot af línunni frá Herði Fannari Sigþórssyni. Mögnuð markvarsla.

Valsmenn tóku svo leikhlé þegar tíu sekúndur lifðu leiks. Þeir gerðu engin mistök og Sturla fyrirliði skoraði sigurmarkið þegar ein sekúnda var eftir af leiknum.

Leiknum var lýst beint á Boltavaktinni: Akureyri - Valur.