Gamli þjálfari Gylfa Þór tekur við liði Schalke

Ralf Rangnick, fyrrum þjálfari Gylfa Þór Sigurðssonar hjá Hoffenheim, hefur verið ráðinn þjálfari Schalke 04 daginn eftir að félagið rak Felix Magath. Schalke verður í pottinum þegar dregið verður í átta liða úrslit Meistaradeildarinnar á morgun en liðið er bara í 10. sæti í þýsku úrvalsdeildinni.

Rangnick sem er 52 ára gamall, skrifaði undir samning til ársins 2014 en hann mun ekki stýra liðinu í fyrsta sinn fyrr en 1. apríl þegar liðið mætir St Pauli. Þangað til mun Seppo Eichkorn stýra liðinu.

Rangnick hætti með Hoffenheim-liðið í janúar en hann hafði áður þjálfað Schalke-liðið frá september 2004 til desember 2005. Liðið náði 2. sæti í þýsku deildinni undir hans stjórn.

Hoffenheim fór upp um tvær deildir undir stjórn Rangnick en hann var í fyrstu ekkert alltof duglegur að gefa Gylfa Þór Sigurðssyni tækifæri þrátt fyrir góða frammistöðu.